1Jo 1 | ASO | STEP | O'moso'mo olihe api' ogo inite' mata' do soto' amivosa a'mine gamenelo' aka'mine ha minivemu' nene luhuvo nite' mene gizo nolo-lingimuze. Ningilo. Ee, a'mine gilune' ido' vetedunu' ningo ninge'mo vo minune' ido' adedunu' do gilune' nemu' nolo-lingimuve. Ado' minevo' minevo' minaali'mi meleho ne'mi monovo've laa' ivemu' nene nolo-lingimuve.

1 John 1

Minevo' Minevo' Minaa' Do Soto' Ive'mi Gamazi

1 O'moso'mo olihe api' ogo inite' mata' do soto' amivosa a'mine gamenelo' aka'mine ha minivemu' nene luhuvo nite' mene gizo nolo-lingimuze. Ningilo. Ee, a'mine gilune' ido' vetedunu' ningo ninge'mo vo minune' ido' adedunu' do gilune' nemu' nolo-lingimuve. Ado' minevo' minevo' minaali'mi meleho ne'mi monovo've laa' ivemu' nene nolo-lingimuve. 2 A'mine ve nene minevo' minevo' ogo minaa' do soto' ine' nene ningune' ve. Ningune' nenako a'minemu' lo-lengemaa' noune. A'mine minevo' minevo' ogo minaa' nene metehida minidoti' soto' o-ledavo ningune' nemu' lo soto' o-lengemaa' noune. 3 Ee, linginesi lazasi a'mido' lute do hamo' ogo bizo minelone lo inite' ningune' ido' gilune' nene lengikisi lo-lengemaa' noune. Ido' laza nene lute do hamo' ogo bizo minaa' noune' nene Meteho O'mososi ido' gipele Izesu' Kilisitokisi bizo minaa' noune. 4 Ido' linginesi ne'mine ogo lute do hamo' ogo bizo mino lolize izo minelone lo nene gamazi nogize-lingimuve.

O'moso'mi Labanaku' Minevo' Dovo' Ogo Minaakumu' Gizine' Gamazi

5 Ido' ezelati' gilune' gamazi nene ne'mino neive: Eita inite' goloso liti'musou' inite' hamokisi mo keke' nomive. Nomivo O'moso ezela neve inite' lamine' labanakovo' neive. 6 Nemu' nene liti'muso monovo golosou' nomonosasi laza ezesi do hamo' ogo bizo none lo lolone' nene sozasi lokunivo ogo molo olone' nene inite' gihile nomoloseive. 7 Ne neiha aza nene labanaku' neine' ne'mino lazasi a'mine'mine ogo labanaku' minevo alevo' olone' nene lute do hamo' ogo lamine' bizo minelesune. Ido' ne'mine okunivo gipele Izesu' vanise ne'mo nene goloso nitete mudise gilite lede'mo vo neivo laminovo' minelesune. 8 Ido' lihime lelita nomive lolone' nene soza lo leli' lute nene golo izelesune. Ne'mine okunivo gamazi gihile nene lelita minamoloseive. 9 Ne neiha laza lihimete lo soto' olone' nene aza a'mine lihimete nene hulo-ledo goloso nite' lelita neine' vai' nene gilite-ledeleseive. Ee, aza nene ve lisihe' mino gote izesa'mine' nenako nemu' lihimete lo soto' okunivo lihimete hulo-ledeleseive. 10 Ne neiha goloso nite' daa' nave lo lo-lemaa' neine' nenako laza goloso nite' ma damaa' noune lo lolone' nene O'mosomu' sozalo' ve ve lo lo-dune' geleleseive. Ido' ne'mine olone' nene eze gamazi leze luteu' minamoloseive.